Voler giusta la giustizia

LA PRATICA LEGALE
Dal dì ch’j’omni a l’an decìs d’vive ansem da bon amìs
che dla tera a toch a toch a son piassne tuti an poch,
da coul’ora, da coul dì tuti ansema a l’an capì
che per vive an amicissia a ventava fè giustissia.
E lì tuti unitament son stampasse un President,
che per subit comensé a fè onor a so misté
lò ch’a jera d’bon e d’bel s’è grinfasslo tut per chiel,
sensa gnanca un fil d’malissia per nen aut che per fé giustissia.
Tujra d’sà, ciadèla d’là el latin l’è mai cambià:
sempre el furb a l’ha rason a le spale del minciòn;
sempre ‘l debol a l’ha tort quand as taca con el fort;
a l’è insomma una delissia la balansa d’la giustissia.
Coul povr’om con des masnà ch’a l’è stait per carità
scortià viv da un mascalsson con doe righe ‘d transassion,
dop aveilo j’avocat mnà da Erode e da Pilat
a j’è vnuje l’iterissia e la mort l’a fait giustissia.
Coul famous bancaroutié ch’a smia fioeul del re da dnè
ch’a l’à fane già a Turin pì che Bertoldo e Bertoldin,
prosperous, grass e rotond chiel s’ampipa d’ tut el mond
e con d’cassia e d’rigolissia manda a licet la giustissia.
Coul gravissim magistrat ch’a s’andeurm stand an senat
che soa pruca e so capel san el codice pì ch’chiel
che second a l’à dormì dis che d’no o dis che d’sì,
coul vicari d’la pigrissia l’è un oracoul d’la giustissia.
Coul amabil senatour cusin prim con el sotrour,
alleato d’tuti cui ch’fan la corda e guerno i frouj
chiel tratandse in abrégé d’slunghé ‘l col e d’tiré j pé
sciavo! Cherpa l’avarissia a impichria fin la giustissia.
Se un parent veul pieve ‘l let deilo subit e sté chiet;
se un amis av romp un brass ringrassielo e andevne a spass;
guai a coul ch’as fa buté ant la tasca di papé!
Guai a coul ch’a s’ancaprissia d’voulei giusta la giustissia!
Paolo Brofferio
Avvocato, senatore del Regno d’Italia e giornalista